చిత్రం-12
-గణేశ్వరరావు
ఈ ‘అమ్మ’ ఫోటో తీసినది అలేనా అనసోవ. ఆమె రష్యన్ ఫోటోగ్రాఫర్. అనేక అంతర్జాతీయ అవార్డ్లు ఆన్డుకుంది. ఈ ఫోటో కూడా అంతర్జాతీయ గుర్తింపు, అవార్డ్ పొందింది. . 5 ఖండాలకు చెందిన 22 దేశాలనుంచి ఫోటోగ్రాఫర్ లు ఆ పోటీలో పాల్గొన్నారు. దృశ్య మాధ్యమంగా మనల్ని అబ్బురపరిచే చాయా చిత్రాల్లో దీన్ని అత్యుత్తమమైనదిగా న్యాయ నిర్ణేతలు గుర్తించారు. దానికి ఎన్నో కారణాలు ఉన్నప్పటికీ – మనం ముఖ్యంగా గమనించదగ్గది ఎలెనా ‘అమ్మ ‘ పట్ల కనబరచిన సృజనాత్మకత, ఆమె దృక్కోణం, సాధారణమైన దృశ్యాన్ని అసామాన్యoగా చూపించిన ప్రతిభ.
ఈ సందర్భంలో రాజాచంద్ర ఫౌండేషన్ వాళ్ళ కృషిని కూడా మనం గుర్తించాలి. ‘అమ్మకి జే జే’ అనే సంకలనాన్ని వాళ్ళు ప్రచురించారు. వివిధ రంగాలకు చెందిన తెలుగు వెలుగులు – ముళ్ళపూడి రమణ-బాపు..బాలమురళీ కృష్ణ.. రావు బాలసరస్వతి.. భానుమతి.. ఎస్పీ.. మొత్తం 18 మంది ‘అమ్మ’ పట్ల వెలిబుచ్చిన అభిప్రాయాలను ఈ పుస్తకంలో పొందుపరిచారు.
రమణ అన్నట్టు ‘అమ్మ జన్మరీత్యా అమ్మ, జీవిత రీత్యా స్నేహితురాలు,బతకడం నేర్పిన గురువు, హాయిని రుచి చూపిన దైవం ‘! అలేనా అనసోవ ‘అమ్మ’ అద్భుత రూపాన్ని ఎంత అద్భుతంగా తన ఫోటోలో బంధించిందో!
*****
గణేశ్వర్రావు ప్రముఖ రచయిత. చిత్రకళ పట్ల వీరికి అమితమైన ఆసక్తి. ప్రత్యేకించి వీరు రాసే చిత్ర కథనాల ద్వారా ఎందరో గొప్ప చిత్ర కళాకారుల్ని పరిచయం చేసారు. ప్రస్తుత నివాసం హైదరాబాద్. ప్రముఖ అనువాదకులు, కేంద్ర సాహిత్య అకాడెమీ అవార్డు గ్రహీత శాంతసుందరి గారు వీరి సతీమణి.