“నెచ్చెలి”మాట
“కరోనాకాలం”
-డా|| కె.గీత
“కష్టకాలం”, “కలికాలం”… అని విన్నాం కానీ “కరోనాకాలం” అనేదొకటుందని ఎప్పుడైనా విన్నామా?
ఇదో ఇప్పుడు వింటున్నాం, ప్రత్యక్షంగా కంటున్నాం.
బొత్తిగా అంతు చిక్కని విషయమేవిటంటే వసంతకాలంలో ప్రారంభమైన ఈ మహమ్మారి కాలం వేసవికైనా ముగుస్తుందో లేదో!?
అసలు “కరోనాకాలం” ఎన్నాళ్లుంటుందో ఎవరికీ తెలియదు!
ఇళ్లని ఎంతకాలం అంటిపెట్టుక్కూచోవాలో, పోయిన ఉద్యోగాల్ని ఎక్కడ వెతుక్కోవాలో అర్థం కాని పరిస్థితి.
రెండు వారాలు ఎవరి నెవరు ముట్టుకోకుండా ఉంటే
అంతా “తూచ్చి” అన్నట్టు మాయమై పోతుందని తేలిగ్గా తీసుకుని
ఆరు వారాలు దాటింది!
మరో నాలుగు వారాలు ముందుకు పొడిగింపైంది!!
మొదటి వారం “వింతగా, ఇదేదో బావుందన్న” ట్టుంది
రెండో వారం “సరే ఇంకో వారమే కదా” అని సర్దుకున్నాం
మూడో వారం “సరుకులు నిండుకుంటే అన్న గాభరా తోనూ”,
నాలుగో వారం “మాస్కులు కుట్టుకుంటూను” గడిపేసేం
అయిదో వారం “గడపదాటక విసుగెత్తి పోతే”,
ఆరో వారం “భయభ్రాంతులతో” మొదలయ్యింది
ఇక ఇప్పుడు
“ఇంకెన్నాళ్ళురా భగవంతుడా” అని తప్ప మరో మాటే గుర్తు రావడం లేదు!
కడుపు నిండా తిండి, కాస్తో కూస్తో బ్యాంకు బాలెన్సున్న వారి పరిస్థితే ఇలా ఉంటే
రెక్కాడితే గానీ డొక్కాడని వారి మాటేంటి?
కరోనా మట్టుబెట్టే దాకా బతకడానికి దారి లేని వారి సంగతేంటి?
ఏదో ఒక మారుమూల గ్రామం నుంచి వలసొచ్చిన బతుకుల మాటేంటి?
అయినా మనకెందుకులే-
నెట్ ఫ్లిక్స్ లోనో
అమెజాన్ లోనో
నోట్ల కట్టలు సొంతంగా ముద్రించుకుని కోట్లు దొంగతనం చేసిన ముఠా ఎలా తప్పించుకుంది?
దొంగే పోలీసుని పెళ్లి చేసుకుంటే ఎలా ఉంటుంది?
కాలంలో వెనక్కి , ముందుకి ప్రయాణం చేసి ఎక్కడ కావాలంటే అక్కడ ప్రత్యక్షమైపోతే!…
లాంటి సీరియల్సు చూసుకుంటూ
ఏ రోజుకారోజు బతికేస్తే పోలా?
కరోనా కాలం ఎన్నాళ్ళుంటే మనకెందుకు?
ఎవరికి గడ్డు రోజులు దాపురిస్తే మనకెందుకు?
గప్ చిప్ న ఎవరిళ్లలో వాళ్లు సరుకులు నిండుకునే వరకు రోజుకో పిండి వంట వండుకు తింటే పోలా?
పాల పేకెట్టుకో, నీళ్ల టాంకర్ దగ్గిరో క్యూ కట్టినట్టు
తెరుచుకున్న మద్యం దుకాణాల దగ్గిరా క్యూకడితే పోలా?
హమ్మయ్య! ఇన్నాళ్ళకి కరోనాకి “మందు” దొరికింది!!
*****
డా|| కె.గీత పూర్తిపేరు గీతామాధవి. వీరు “నెచ్చెలి” వ్యవస్థాపకులు, సంపాదకులు. తూ.గో.జిల్లా జగ్గంపేటలో జన్మించారు. ప్రముఖ కథా రచయిత్రి శ్రీమతి కె. వరలక్ష్మి వీరి మాతృమూర్తి. భర్త, ముగ్గురు పిల్లలతో కాలిఫోర్నియాలో నివాసముంటున్నారు.
ఆంధ్ర విశ్వవిద్యాలయంలోఇంగ్లీషు, తెలుగు భాషల్లో ఎం.ఏ లు, తెలుగు భాషా శాస్త్రం లో పిహెచ్.డి చేసి, 10 సం. రాల పాటు మెదక్ జిల్లాలో ప్రభుత్వ కళాశాల అధ్యాపకురాలిగా పనిచేసారు. ఆంధ్ర ప్రదేశ్ ప్రభుత్వం నించి 2006 లో “ఉత్తమ ఉపాధ్యాయ అవార్డు ” పొందారు.అమెరికాలో ఇంజనీరింగ్ మేనేజ్ మెంట్ లో ఎం.ఎస్ చేసి, ప్రస్తుతం సాఫ్ట్ వేర్ రంగంలో భాషా నిపుణురాలిగా పనిచేస్తున్నారు.
ద్రవభాష, శీతసుమాలు,శతాబ్దివెన్నెల, సెలయేటి దివిటీ, అసింట కవితాసంపుటులు, సిలికాన్ లోయ సాక్షిగా కథాసంపుటి, వెనుతిరగనివెన్నెల నవల, At The Heart of Silicon Valley -Short stories (2023),Centenary Moonlight and Other Poems(2023) ప్రచురితాలు. నెచ్చెలి ప్రచురణ “అపరాజిత” – గత ముప్పయ్యేళ్ల స్త్రీవాద కవిత్వం (1993-2022) పుస్తకానికి సంపాదకులు & ప్రచురణకర్త. ‘యాత్రాగీతం’ ట్రావెలాగ్స్, ‘కంప్యూటర్ భాషగా తెలుగు’ పరిశోధనా వ్యాసాలు కొనసాగుతున్న ధారావాహికలు. అజంతా, దేవులపల్లి, రంజనీ కుందుర్తి, సమతా రచయితల సంఘం అవార్డు, తెన్నేటి హేమలత-వంశీ జాతీయ పురస్కారం, అంపశయ్య నవీన్ పురస్కారం మొ.న పురస్కారాలు పొందారు.
టోరీ రేడియోలో “గీతామాధవీయం” టాక్ షోని నిర్వహిస్తున్నారు. తానా తెలుగుబడి ‘పాఠశాల’కు కరికులం డైరెక్టర్ గా సేవలందజేస్తున్నారు. కాలిఫోర్నియా సాహితీ వేదిక “వీక్షణం”, తెలుగు రచయిత(త్రు)లందరి వివరాలు భద్రపరిచే “తెలుగురచయిత” వెబ్సై ట్ వ్యవస్థాపకులు, నిర్వాహకులు.