షర్మిలాం “తరంగం”

నో (వరస్ట్ ) కామెంట్స్ ప్లీజ్ !

-షర్మిల కోనేరు 


   ఇన్నాళ్ళూ మనకి తెలియని మనుషుల మనస్తత్వాలు ఇప్పుడు బయటపడుతున్నాయి .
ఫేస్బుక్ ,ట్విటర్ వంటివి రాక ముందు మూక మనస్తత్వం , ఈ గ్రూపులు కట్టడాలు అంతగా తెలిసేవి కాదు .
మనుషులు తమ మనస్తత్వాలను  పుస్తకంలో పరిచినట్టు పరిచేస్తుంటే అవి చదివి ఇలా కూడా అలోచిస్తారా అని బెంగ , బాధ , కోపం అన్నీ వస్తాయి .
నువ్విలా వుండకపోతే నిన్ను చీల్చి చండాడతాం అన్న నిరంకుశత్వాన్ని ప్రదర్శించే గ్రూపులు తయారయ్యాయి .
 ఇది జరిగి చాలాకాలమైంది .
ఒక కలెక్టర్ తెలంగాణాలో అనుకుంటాను దళితులను మీ ఆహారపు అలవాట్లు కొత్తగా మార్చుకోవద్దు … అనాదిగా మీరు తినే గొడ్డు మాసం తినండి అని ఒక సందర్భంలో సూచించాడు .
ఎందుకంటే అది చౌకగా లభించే ప్రొటీన్ కాబట్టి శ్రమ చేసుకునే వర్గాలకి శక్తినిస్తుందని అలా చెప్పాడు .
ఇక చూస్కోండి కొన్ని వర్గాలు చెలరేగిపోయి అతన్ని తిట్టడం మొదలెట్టాయి .
ఇదే ఫేస్బుక్ లో ఎవరో పెడితే నేనో కామెంట్ పెట్టాను .
” ఎవరి ఆహారపు అలవాట్లు వారివి .
అనాదిగా వారు దాన్ని తింటున్నారు .
ఇతర దేశాల్లో బీఫ్ తినడం చాలా మామూలు .
నేను కూడా ట్రై చేద్దామనుకున్నాను గానీ మా అమ్మ ఆవుకి పూజ చేస్తుంది కాబట్టి నేను తినలేదు ” అని పెట్టా .
దానికి ఉన్మాదం తార స్థాయికి చేరిన ఒక గ్రూప్ వ్యక్తి అనుచితంగా  ” నువ్వు అసలు ఒక అబ్బ కి …..” ఇలా ఏదో కూశాడు .
నేను చాలా శాంతంగా ” నా పూజనీయమైన అమ్మని నీచంగా అనడం ఎంత సబబో నీ విజ్ఞతకే వదిలేస్తున్నా ” అని పెట్టాను .
ఇంతే కాదు స్త్రీల ఉద్యమాల్లో పనిచేసే నా స్నేహితులు భయంకరమైన ట్రోలింగ్ కి గురవడం చూసి భయమేసింది .
నిజంగా అవన్నీ తట్టుకుంటున్నందుకు చేతులెత్తి దణ్ణం పెట్టాలనిపించింది .
ముఖ్యంగా స్త్రీలను గురించి మాట్లాడాలంటే వారి కేరక్టర్ గురించి అవాకులు చవాకులు పేలడం అనాదిగా వున్నదే .
కానీ సోషల్ మీడియాలో కొన్ని కామెంట్లు చదువుతుంటే జుగుప్సతో కంపించిపోతాం.
ఇంతకీ వాళ్ళు  ఏం ఘోరం చేశారని ఈ అవమానాలు !.
భర్తను కన్నవారే హత్య చేయిస్తే ఆ యువతి తన అత్తింట్లో వున్నందుకు ఆమెని సోషల్ మీడియా వేదికగా తిడుతున్నారు .
ఆ స్త్రీ ఉద్యమకారిణులు దీనిని ఖండిస్తూ ఆమె బతుకు ఆమెని బతకనివ్వండంటూ ఆ యువతికి మద్దతు పలికారు .
అదే వీళ్ళు  భరించలేకపోయారు .
నోటికి వచ్చిన తిట్లతో , వ్యక్తిగత దూషణలతో కామెంట్స్ పెట్టారు .
ఒక వ్యక్తి ఆ ఉద్యమకారిణిని ఉద్దేశించి “నువ్వు ఇన్ని నెగటివ్ కామెంట్స్ చూసి కూడా ఇంకా చావలేదా !” అని పెట్టాడు .
అది చదివి నాకు అనిపించింది ఉద్యమాలు చేసేవారి బాట ఎంత ముళ్ళ మయం !
ఇల్లూ వాకిలీ వదిలి ధరలు పెరిగితే , మన బిడ్డలు అత్యాచారాలకు గురైతే , కట్నాల్ కోసం చంపేస్తే , నడి రోడ్డు మీద వదిలేస్తే ఎండనకా వాననకా రోడ్ల మీదికొచ్చి పోరాడుతున్నందుకు ప్రతిఫలం ఇదా .

పైగా ” ఆ …ఏదో డబ్బులు రాకపోతే ఇవన్నీ చేస్తారా !” అని దీర్ఘాలు తీయడం .
పోనీ ఆ డబ్బుల కోసం మీరెవరన్నా పోలీసు లాఠీదెబ్బలు తినండి …కేసుల పరిష్కారానికి తిండి తింటం కూడా మరిచి పోయి పోలీస్ స్టేషన్లలోనూ , ఊళ్ళ వెంబడి  తిరిగి చూడండి .
మీ అభిప్రాయాలు  మీకు వుండొచ్చు … కానీ ఇది వ్యక్తపరచడానికి సంస్కారవంతమైన భాష వుంది .
వాళ్ళూ మనుషులే …వాళ్ళకీ కుటుంబాలుంటాయి .
మీ వ్యాఖ్యలు ఎంతబాధిస్తాయి ?
” నీ మొగుడు నిన్ను ఊరి మీదకి వదిలేశాడే !”
ఇది ఆ వ్యాఖ్యల్లో తక్కువ రోత పుట్టించేది.
అంటే అలోచించండి ఇంకొన్ని ఎంత దారుణంగా వుండి వుంటాయో ?
కానీ ఇవేమీ లెక్క చేయకుండా మనో నిబ్బరంతో ముందుకు సాగుతున్న ఆ అమ్మలకు “శతకోటి ఎర్రెర్ర వందనాలు !”
( వందల కొద్దీ వచ్చిన బూతు వ్యాఖ్యలను చూసి చూడవే వీళ్ళు … అని నవ్వేసే నా ప్రియ నెచ్చెలి పీవోడబ్ల్యూ సంధ్యకు)

*****

Please follow and like us:
error

One thought on “షర్మిలాం“తరంగం”-16”

  1. Chala bavundhi…
    Ee rojullo Pakkintlo em jaruguthundho chudali anukune masthathwam unna vaari madhyalo bathukutgunnam. (Big Boss) lanti shows.
    Alantidhi oka aadadhaanni uddhesinchi nechamyna matalu matladaraa.
    Ee society ela unnaa meekosam
    (MAHILALA) Kosam memunnaam ani galametthe vaariki naa sirassu vanchi kruthagnathalu teliyajesukuntunna. Sharmila gariki naa abhinandhanalu.

Leave a Reply to V R Reddy Cancel reply

Your email address will not be published.