“నెచ్చెలి”మాట
యుద్ధం
-డా|| కె.గీత
ఎప్పుడూ
విననివీ
కననివీ
ఎవరికో
జరిగినవని
జరుగుతున్నవని
వార్తల్లో
చదువుతున్నవి
వింటున్నవి
కంటున్నవి
అన్నీ
గుమ్మం
ముందుకొచ్చి
కూచున్నట్టే
యుద్ధమంటే
సరాసరి
ఇంట్లోకొచ్చి
బాధలు
తిష్ట వేసినట్లే
ఎప్పుడు
ఎవరి నెత్తి మీద
ఏం పడుతుందో
ఎవరికీ
ఎప్పుడు
మూడుతుందో
తెలియని
భవిష్యత్తు
యుద్ధం
కయ్యానికి
కాళ్లూ చేతులూ
దువ్వుతున్నపుడు
పోరాటమూ
తప్పదు
జీవన పోరాటమూ
తప్పదు
ఎవ్వరేం
చేసినా
చెయ్యకున్నా
జరిగేది
జరగక
తప్పదు
గత చరిత్ర
ఎక్కడ
తవ్వినా
బయల్పడేవి
ఎన్నెన్నో
యుద్ధాలు
ఇప్పుడిక
వర్తమానాన్ని
తడిమినా
యుద్ధాలే
ప్రాణభయం
ముందు
అన్ని భయాలూ
బలాదూర్
యుద్ధంలో
ఏ దేశపు
సామాన్య
బతుకైనా
ఛిద్రమే
ఎంతకీ
తెమలని
యుద్ధపు
రక్కసి
కోరల్లో
ఆరని
ఎరుపు
తెగిపడిన
అవయవాల
మధ్య
కూడగట్టుకున్న
అవయవాలతో
రోజువారీ
యుద్ధం
ఎప్పుడు
ఏం
మూడుతుందో
ఎవరి నెత్తి మీద
ఏం కూలుతుందో
తెలియని
యుద్ధంలో
విశ్రమించిన
ఒక్క నిమిషమైనా
వైషమ్యాల్ని
మర్చిపోగలిగితే
బావుణ్ణు
యుద్ధమనేది
చరిత్రతోనే
ఆగితే
బావుణ్ణు
****
నెచ్చెలి పాఠకులందరికీ సదవకాశం:
ప్రతినెలా నెచ్చెలి పత్రికలో వచ్చే రచనలు / “నెచ్చెలి” యూట్యూబ్ ఛానెల్లో వచ్చిన ఆర్టికల్స్ వేటిపైనైనా వచ్చిన కామెంట్ల నించి ప్రతి నెలా ఒక ఉత్తమ విశ్లేషణాత్మక కామెంటుని ఎంపిక చేసి ప్రకటిస్తాం. పాత రచనల మీద కూడా కామెంట్లు చెయ్యవచ్చు.
మరింకెందుకు ఆలస్యం? రచనల్ని చదివి వివరంగా కామెంట్లు పెట్టడం ప్రారంభించండి.
వినూత్నం, వైవిధ్యం ప్రధాన నిలయాలైన “నెచ్చెలి”లో వస్తున్న వివిధ వినూత్న రచనల్ని తప్పక చూసి, చదివి ఆనందిస్తారు కదూ!
*****
ఏప్రిల్, 2025 లో ఎంపికైన ఉత్తమ కామెంటు రాసిన వారు: దామరాజు విశాలాక్షి
ఉత్తమ కామెంటు అందుకున్న పోస్టు:లంకంత ఇల్లు (కథ) – కె.వరలక్ష్మి
ఇరువురికీ అభినందనలు!
****
డా|| కె.గీత పూర్తిపేరు గీతామాధవి. వీరు “నెచ్చెలి” వ్యవస్థాపకులు, సంపాదకులు. తూ.గో.జిల్లా జగ్గంపేటలో జన్మించారు. ప్రముఖ కథా రచయిత్రి శ్రీమతి కె. వరలక్ష్మి వీరి మాతృమూర్తి. భర్త, ముగ్గురు పిల్లలతో కాలిఫోర్నియాలో నివాసముంటున్నారు.
ఆంధ్ర విశ్వవిద్యాలయంలోఇంగ్లీషు, తెలుగు భాషల్లో ఎం.ఏ లు, తెలుగు భాషా శాస్త్రం లో పిహెచ్.డి చేసి, 10 సం. రాల పాటు మెదక్ జిల్లాలో ప్రభుత్వ కళాశాల అధ్యాపకురాలిగా పనిచేసారు. ఆంధ్ర ప్రదేశ్ ప్రభుత్వం నించి 2006 లో “ఉత్తమ ఉపాధ్యాయ అవార్డు ” పొందారు.అమెరికాలో ఇంజనీరింగ్ మేనేజ్ మెంట్ లో ఎం.ఎస్ చేసి, ప్రస్తుతం సాఫ్ట్ వేర్ రంగంలో భాషా నిపుణురాలిగా పనిచేస్తున్నారు.
ద్రవభాష, శీతసుమాలు,శతాబ్దివెన్నెల, సెలయేటి దివిటీ, అసింట కవితాసంపుటులు, సిలికాన్ లోయ సాక్షిగా కథాసంపుటి, వెనుతిరగనివెన్నెల నవల, At The Heart of Silicon Valley -Short stories (2023),Centenary Moonlight and Other Poems(2023) ప్రచురితాలు. నెచ్చెలి ప్రచురణ “అపరాజిత” – గత ముప్పయ్యేళ్ల స్త్రీవాద కవిత్వం (1993-2022) పుస్తకానికి సంపాదకులు & ప్రచురణకర్త. ‘యాత్రాగీతం’ ట్రావెలాగ్స్, ‘కంప్యూటర్ భాషగా తెలుగు’ పరిశోధనా వ్యాసాలు కొనసాగుతున్న ధారావాహికలు. అజంతా, దేవులపల్లి, రంజనీ కుందుర్తి, సమతా రచయితల సంఘం అవార్డు, తెన్నేటి హేమలత-వంశీ జాతీయ పురస్కారం, అంపశయ్య నవీన్ పురస్కారం మొ.న పురస్కారాలు పొందారు.
టోరీ రేడియోలో “గీతామాధవీయం” టాక్ షోని నిర్వహిస్తున్నారు. తానా తెలుగుబడి ‘పాఠశాల’కు కరికులం డైరెక్టర్ గా సేవలందజేస్తున్నారు. కాలిఫోర్నియా సాహితీ వేదిక “వీక్షణం”, తెలుగు రచయిత(త్రు)లందరి వివరాలు భద్రపరిచే “తెలుగురచయిత” వెబ్సై ట్ వ్యవస్థాపకులు, నిర్వాహకులు.
ఈ నెల ( మే ) సంచికలో సంపాదకీయంలో డాక్టర్ గీత గారు రాసిన కవిత “యుద్దం” కవిత చాలా బాగుంది. ఈ యుద్దాలు ఎందుకు చేస్తారో ,అలా ఒకరినొకరు చంపుకుంటే ఏమొస్తుందన్నది నాలో ఎప్పుడూ మెదిలే మిలియన్ డాలర్ ప్రశ్న. రష్యా ఉక్రైన్ మీద దాడి చేసినా , మొన్నటి పెహల్ గాం దాడి చూసినా మనసు ద్రవించిపోయింది . పొద్దున్న లేస్తే ఎవరు ఎక్కడ బాంబ్ వేసేరన్న వార్త వినవలసి వస్తుందేమోనన్న భయం, బాధ . రోడ్ లో ఏక్సిడెంట్ అయిన దృశ్యం టీవి లో, పేపర్ లో చూస్తేనే భరించలేని మనసు, ఈ యుద్దాలని ఎలా తట్టుకుంటుంది ? నా మదిలో భావాలే గీత గారు తన కవితలో రాసేరనిపించింది. నా దేశాన్ని కాపాడమనీ , సుభిక్షంగా ఉంచమనీ దేవుణ్ణి రోజూ
ప్రార్థిస్తుంటాను.
నిజమే.. బయటా, లోపలా అంతటా యుద్ధమే. బయటి యుద్ధం ప్రయత్న పూర్వకంగా ఆపవచ్చు. మరి లోపలి యుద్ధం? తెలియకుండానే అంతరాంతరాళాల్లో జరుతున్న విధ్వంసం? అందరం ఏదో క్షణంలో ఇటువంటి లోలోపలి రహస్య యుద్ధ బాధితులమే. మననుంచి మనల్ని విముక్తం చేయడం తెలియాలి. ఏదిఏమైనా.. చివరకు మనకి మనం మిగలాలి. యుద్ధానికి, యుద్ధానికి మధ్య విరామంగా కాదు.. బతుక్కు బతుక్కు మధ్య శాశ్వతంగా మానవత్వ శాంతి పరిఢవిల్లాలి.