చిత్రలిపి
“పలు గాకుల గోల …!”
-మన్నెం శారద
అక్కడేమిటో ఒకటే పాడు కాకుల గోల !
ప్రొద్దుటే వాటి సొమ్మేదో పోయినట్లు
వెర్రి గొంతులేసుకుని వెధవ గోల ….
నాలుగు మెతుకులకోసం నానా అల్లరీ చేస్తున్నాయ్ …
ఏమిటని చూద్దునా ..
గాయపడిన కాకొకటి వాటినడిమధ్యన మూలుగుతున్నది
దానికి సాయపడలేక
చేసే చేతులు లేక …
అవి బొంగరం లా చుట్టూ తిరిగి
అదేపనిగా ఏడుస్తున్నాయి …
సంగీతం తెలియని గొంతులూ …
సాహిత్యం తెలియని మనసులూ
మాటలు రాని నోళ్ళూ …
దేవుళ్ళని ..పూజల్నీ ఎరుగని ప్రాణులు
మనుషులచేసే కాలుష్యాన్ని శుభ్రపరిచి
రూపు గొంతూ లేదని హేళన కి
గురయ్యే పనికిమాలిన పక్షులు !
అంతే …అంతే …వాటి గోలంతే !
…ఇక్కడేమిటి అంతకు మించిన అరుపులు …కాకులు కావే మరి …
ముసలాయన చచ్చాడు ,,,వృద్ధాశ్రమం లో …
కొడుకులూ కూతుళ్ళూ దిగారు
విదేశాలనుండి …విమానాల్లో …
ఆ నగ నాదని …
ఈ నగ నాదనీ కూతుళ్ళూ
పొలం పుట్రా , కొంపాగోడుకోసం కొడుకులూ….
నిన్నటినుండి తన్నుకు చస్తున్నారు …
తెగడం లేదు రగడ
..సంగీత సాహిత్యాలు తెలిసిన మేధావులు
పాపపుణ్యాల గురించి అనర్గళం గా మాట్లాడగల మనుషులు వాళ్ళు
కాకులు కాదు కాదు వారు పాపం
పలుగాకులు !!!
*****
నా పదహారవ ఏటనుండి కథలు రాస్తున్నాను. నా మొదటి మూడు నవలకి బహుమతులు వచ్చాయి. అనేక కథలు బహుమతులు అందుకున్నాయి. రెండుసార్లు నంది అవార్డ్స్ అందుకున్నాను. తెలుగు యూనివర్సిటీ నుండి ఉత్తమ రచయిత్రి అవార్డు అందుకున్నాను. నంది అవార్డ్స్ కమిటీ లో రెండుసార్లు పనిచేసాను. The week Magazaine నన్ను Lady with golden pen గా ప్రశంసించింది. దాదాపు వెయ్యి కథలు, 45 నవలలు రాసాను. చిత్రకళ నా హాబీ.