వసివాడిన ఆకులు (నెచ్చెలి-2023 పోటీలో సాధారణ ప్రచురణకు ఎంపికైన కవిత)

వసివాడిన ఆకులు

(నెచ్చెలి-2023 పోటీలో సాధారణ ప్రచురణకు ఎంపికైన కవిత)

– శ్రీధర్ బాబు అవ్వారు

వీరులు పుట్టేదెల
‍‍‍‍దగ్ధమైన పౌరుషపు మసి దొర్లుతున్న వేళలో…

సడలి ఊగులాడుతున్నా
బిగుసుకోవాల్సిన నరాలిపుడు…

మారిపోయిందా అంతా…
మర్చిపోయామా… గత రుధిర ధారల చరిత
కలుగులో దాక్కుందా వీరత్వం.

ఇప్పుడు మ్యూజియంలో చిత్రాలై నవ్వుతున్నారు పోరుబాట సాగించిన ముందుతరం…

వేళ్ళు పిడికిళ్ళెలా అవుతాయి….!
అడుగు భయాందోళనల మడుగైనప్పుడు.

వెనుక వెనుకగా దాపెడుతున్నావుగా
వడలిపోయిన మెదడును మోస్తున్న తలను…

పిడికిలిని మరిచి
వసివాడిన ఆకులై మసిలాడుతున్నట్లే…
నాలుగు గోడల మధ్య సమాజాన్ని మరిపించి బందింపబడ్డ కాన్వెంట్ ముద్దుబిడ్డలు.

మత్తుగా జోగాడు తున్నారు
స్వార్ధపు కప్పలను మింగిన పాముల్లా….

చాన్నాళ్ళ క్రితం అనుకుంటా
ఎదుగుతున్న దశ
ఎలుగెత్తి అరిచేది అన్యాయమెదిరిస్తూ…

అంతా కనికట్టు…
ఏలుతున్న తలల నుండి ఎగజిమ్మిన
ఆలోచనలతో పేర్చిన శవ పేటిక…
ఇతర ఇంకేనాయకత్వం చెల్లదు
వారసత్వం తప్ప….

నడూవ్ గీసిన గీతలపైనే….
కాళ్ళు అదుపు తప్పితే తప్పదు కొరడా వేటు…

అయినా…
అసలు శవాలు ఎక్కడ కాళ్ళు కదిలిస్తాయి…!

కల అయినా ఒకటి కను కమ్మనిది.
బిగ్గరగా అరిచినట్లు…
చెయ్యెత్తి నినదించినట్లు..
చూపుడువేలు సూటిగా గుండెల్లోకి దిగ్గొట్టినట్లు.. మనసంతా సింధూరపు రంగు నింపుకున్నట్లు..

అదిగో అటుచూడు…
తీగలాంటి మొక్క ఒకటి తుఫాన్ గాలితో
యుద్ధం చేసి నిలదొక్కుకొని నిల్చుంది.

*****

Please follow and like us:

శ్రీధర్ బాబు అవ్వారు

అవ్వారు శ్రీధర్ బాబు వృత్తిరీత్యా ఉపాధ్యాయులు. కవిత్వం రాయడం, రచనలు చేయడం ప్రవృత్తి.

పెన్నా రచయితల సంఘం అధ్యక్షులు, జాషువా కవితా పీఠం ప్రధాన కార్యదర్శి, అభ్యధయ రచయితల సంఘం నెల్లూరు కార్యదర్శిగా సేవలు అందిస్తున్నారు.

రచనలు :- పూలతివాచి కవితా సంపుటి

               – ఎగురుతున్న పద్యం కవితా సంపుటి

                -జీనవ చిత్రాలు కథా సంపుటి

               – మంచు బిందువులు నానీల సంపుటి

               – చందమామ పదాలు మాత్రా ఛందస్సులో…

               – పిల్లల పుస్తకాలు 3 కథలు పాటలు గేయలతో…

పురస్కారాలు:-

       – ఎక్స్ రే ఉత్తమ కవితా అవార్డు 2టైమ్స్

        -రంజని కుందుర్తి మంచి కవితా పురస్కారం

        -బాల రంజని వారి నుండి   బాల మిత్ర అవార్డు

          – గిడుగు రామమూర్తి పంతులు సాహిత్య సేవ పురస్కారం.

           – dr. ఎద్దుల శిద్దారెడ్డి స్మారక పురస్కారం

           – అడవి బాపరాజు సాహిత్య పురస్కారం

           – జాషువా సాహిత్య పురస్కారం

          – శ్రీ పతురు మాణిక్యాంబ సాహితీ సేవ పురస్కారం.

– శ్రీ లక్కరాజు వెంకట గిరిజా శంకర్ ఉత్తమ కవితా పురస్కారం.

ఎగురుతున్న పద్యం కవితా సంపుటాలను వచ్చిన పురస్కారాలు –

-జనరంజక కవి ప్రతిభ పురస్కారం

-బెంగుళూర్ తెలుగు సాహిత్య సామాఖ్య పురస్కారం

– గిడుగు రామమూర్తి పంతులు సాహితీ పురస్కారం