నీతో పడవ ప్రయాణం (కవిత)

నీతో పడవ ప్రయాణం

-గవిడి శ్రీనివాస్

నేనిప్పుడు
నీ జ్ఞాపకాలతో పడవ ప్రయాణం చేస్తున్నాను.

ఏటు ఒడ్డున ఆగి
ఇసుక గూళ్లలో దాగి
నీ పరిమళ సుగంధాన్ని పీల్చుకుంటున్నాను.

నీ వొడిలో వాలి
నక్షత్రాల్ని లెక్కపెట్టడం
నీ కౌగిలిలో
క్షణాలు ఆగిపోవడం.

అలా
ఊపిరి సలపని
జ్ఞాపకాలతో నలిగిపోతున్నాను.

నేను నిశ్చలంగా ఉండలేను
కొలమానాల కారణంగా
దూరం గా సాగిపోయావు.

చిన్ని జీవితానికి
వెన్నెల జ్ఞాపకాలు
వేదన రోదనలు తప్పా
మాటల స్పర్శే లేని
ఒంటరి జీవితాలకి
జ్ఞాపకాలు
చెరో దిక్కున సాగుతాయి.

కలలు కనే వయసులో
ఆత్మీయ లోకంలో జీవించాను.

క్షణాల్ని పోగుచేసి
నీ కోసం ప్రేమ వారధి నిర్మించాను.
నా గుండె గుడిలో
దీపాలు వెలిగిస్తావనీ….

ఇప్పుడు చెప్పు
గాయపరిచిన గొంతు కాలానిదా
ఆర్థిక బంధాలదా….
నాకు తెలీదు కానీ
నిన్ను కళ్ళల్లో వెలిగించు కోవటం తప్పా.

నీతో సాగిన పడవ ప్రయాణాల్ని
కళ్ళలో నడిపించుకోవటం తప్పా
నాకింకేమీ తెలీదు…!

*****