ఇంకెంత ఇష్టమో ఈ నిజానిది? (కవిత)

ఇంకెంత ఇష్టమో ఈ నిజానిది?

-చందలూరి నారాయణరావు

చీకటి బాగా కాసి
మనసును పులిమినప్పుడు

పాత కలే
చిరిగిన గుడ్డల్లో మాసిన ముఖంతో
కోరిక తలుపు కొడుతూనే ఉంది.

రెండు క్షణాల వయసులోనే ఇష్టం
ప్రేమగా పరవశమై
తన నీడనే తనే తొడుక్కుని

తలలో కంటికెదురుగా లోతు ప్రశ్నలతో
యుద్ధనౌకలో పొలిమేర దాకా సాగే
కలవరింత వేడుకలో పరిమళిస్తూ

దిక్కు తెలియకుండానే
దారితో పనిలేకుండా
ఆశ సువాసనతో గెంతులేసుకుంటూ
గాలితో కలసి లోపల చేసే ప్రయాణంలో

ఇంకెంత నిజమో ఈ ఇష్టానిది?
ఇంకెంత దగ్గరో ఆ గమ్యానిది?

*****