వికసించే సందర్భాన్ని కలగంటూ (కవిత)

వికసించే సందర్భాన్ని కలగంటూ

-గవిడి శ్రీనివాస్

మౌనంగా ఉండే మనసు
రెప్పల పై ఎగిరే తూనీగలకి
స్పందిస్తుంది.

ఈ కాసింత మౌనం
చూపులతో మాట్లాడుతుంది.

విరిసే గులాబీల మీద
మెరిసే రెమ్మల మీద
కాంతిని ఈ కళ్ళలోకి
ప్రవహింప చేస్తుంది.

పువ్వు సహజంగానే
వికసిస్తున్నట్లు
మనసు మౌనంగానే
పరిమళిస్తుంది.

సమాధాన పరచలేని ప్రశ్నలకి
ప్రకృతి ధర్మం జవాబు ఇస్తుంది.

నా చుట్టూ వీచే గాలులు
ఊగే ఆకులు
మనసుని ముంచి పోతుంటాయి.

నేను నా కలల ప్రపంచంలో
మునిగిపోతుంటాను.

కలువ పువ్వులా
వికసించే సందర్భాన్ని కలగంటూ….!

*****