“నెచ్చెలి”మాట
“నెట్టిం”టి సాహితీ చెలి- నెచ్చెలి!
-డా|| కె.గీత
“నెచ్చెలి”కి అప్పుడే ఏడాది నిండింది!
“ఈ ఏడాదిగా “నెచ్చెలి” ఏమేం చేసిందీ?” అంటే
అబ్బో , చెప్పడానికి బోల్డు విశేషాలున్నాయి. ఓపిగ్గా చదువుతానంటే కాసుకోండి మరి!
ముందస్తు విశేషం ఏవిటంటే-
ప్రతి నెల్లోనూ కాసిన్ని కొత్త విశేషాలు చేర్చుకుంటూ ఏడాదికి తప్పటడుగులు కాదు ఏకంగా పరుగు ప్రారంభించింది.
అదీ సంగతి!
ముందుగా నా మీద ప్రేమతో అడగగానే తొలి సంచిక నుండీ రాస్తున్న నెచ్చెలి రచయిత్రు(త)లందరికీ
పేరుపేరునా నెనర్లు!
43000 దాటిన హిట్ల సంఖ్య తో అందరి మనసు మెచ్చిన “నెచ్చెలి” అయింది! తెలుగు అంతర్జాల స్త్రీల పత్రికలలో అగ్రస్థానంలో నిలిచింది!
ఇందుకు కారణభూతమైన పాఠకులైన మీ అందరికీ అనేకానేక నెనర్లు!
పత్రిక ప్రారంభించడానికి ఎన్ని కారణాలున్నా జూలై 10 నే ప్రారంభించడానికి మాత్రం కారణం మా చిన్నమ్మాయి “సిరివెన్నెల” పుట్టినరోజు కూడా అదే రోజు కావడమే. కాబట్టి జూలై 10 అంటే మా ఇంట గొప్ప పండుగే అన్నమాట!
ఇక తెలుగు పాఠకులకి ప్రపంచ వ్యాప్తంగా ఉన్న అన్ని రంగాల్లోనూ అత్యుత్తమ స్థాయికి చేరిన మహిళల స్ఫూర్తిని , సాహిత్యాన్ని, ఔన్నత్యాన్ని పరిచయం చేసే దిశగా దాదాపు 70 శీర్షికలతో స్త్రీల కథలు, కవిత్వం, నవలలు, జీవితచరిత్రలు, పరిశోధనలు, కళలు, సినిమాలు వంటి అనేక కాలమ్స్, ధారావాహికలతో బాటూ మగవారి ప్రత్యేక విశేష రచనలు కూడా కలుపుకుంటూ అన్నిటినీ ఒక చోటికి తీసుకొచ్చి అందిస్తున్న “నెచ్చెలి” తెలుగు, ఇంగ్లీషు భాషల్లో నెలనెలా క్రమం తప్పకుండా 10 వ తారీఖుకి విడుదల అవుతూ ఉంది.
మీ క్యాలెండర్లని మార్కు చేసుకోండి. ప్రతినెలా 10 వ తారీఖు “నెచ్చెలి” మీ “నెట్టిం”ట అడుగుపెట్టే సుదినం!
తెలుగు భాష లోంచి ఆంగ్ల భాషలోకి వస్తున్న అనువాదాలను, పూర్తిగా ఆంగ్ల భాషలో రాస్తున్న ఇప్పటి యువతరాన్ని ప్రోత్సహిస్తూ ముందుకు సాగుతున్న “నెచ్చెలి- ఇంగ్లీషు”(Neccheli-English) ద్వారా ప్రపంచ వ్యాప్తంగా అనేక మందికి చేరువవుతున్నందుకు ఎంతో సంతోషంగా ఉంది.
మీ రచనలు ఏవైనా ఇంగ్లీషులోకి అనువదింపబడి, పత్రికల్లో అముద్రితమైనవైతే “నెచ్చెలి- ఇంగ్లీషు”(Neccheli-English) మీకు ఆహ్వానం పలుకుతూ ఉంది. వెంటనే పంపండి.
“నెచ్చెలి” కి రచనలు పంపడానికి మీరు స్త్రీలే కానవసరం లేదు, పురుషులకూ ఆహ్వానం!
వినూత్న రచనాపద్ధతి మీ స్వంతమైతే తప్పకుండా editor.neccheli@gmail.com ను సంప్రదించండి.
రచనలు పంపే ముందు నెచ్చెలి “రచనలు- సూచనలు” పేజీలోని సూచనలు చూడండి.
మీ/ నా అభిమాన “నెచ్చెలి” ఇలాగే ఉత్సాహపూరితంగా కొనసాగడానికి మీ సహకారం ఎప్పటిలానే అందిస్తారు కదూ!
*****
డా|| కె.గీత పూర్తిపేరు గీతామాధవి. వీరు “నెచ్చెలి” వ్యవస్థాపకులు, సంపాదకులు. తూ.గో.జిల్లా జగ్గంపేటలో జన్మించారు. ప్రముఖ కథా రచయిత్రి శ్రీమతి కె. వరలక్ష్మి వీరి మాతృమూర్తి. భర్త, ముగ్గురు పిల్లలతో కాలిఫోర్నియాలో నివాసముంటున్నారు.
ఆంధ్ర విశ్వవిద్యాలయంలోఇంగ్లీషు, తెలుగు భాషల్లో ఎం.ఏ లు, తెలుగు భాషా శాస్త్రం లో పిహెచ్.డి చేసి, 10 సం. రాల పాటు మెదక్ జిల్లాలో ప్రభుత్వ కళాశాల అధ్యాపకురాలిగా పనిచేసారు. ఆంధ్ర ప్రదేశ్ ప్రభుత్వం నించి 2006 లో “ఉత్తమ ఉపాధ్యాయ అవార్డు ” పొందారు.అమెరికాలో ఇంజనీరింగ్ మేనేజ్ మెంట్ లో ఎం.ఎస్ చేసి, ప్రస్తుతం సాఫ్ట్ వేర్ రంగంలో భాషా నిపుణురాలిగా పనిచేస్తున్నారు.
ద్రవభాష, శీతసుమాలు,శతాబ్దివెన్నెల, సెలయేటి దివిటీ, అసింట కవితాసంపుటులు, సిలికాన్ లోయ సాక్షిగా కథాసంపుటి, వెనుతిరగనివెన్నెల నవల, At The Heart of Silicon Valley -Short stories (2023),Centenary Moonlight and Other Poems(2023) ప్రచురితాలు. నెచ్చెలి ప్రచురణ “అపరాజిత” – గత ముప్పయ్యేళ్ల స్త్రీవాద కవిత్వం (1993-2022) పుస్తకానికి సంపాదకులు & ప్రచురణకర్త. ‘యాత్రాగీతం’ ట్రావెలాగ్స్, ‘కంప్యూటర్ భాషగా తెలుగు’ పరిశోధనా వ్యాసాలు కొనసాగుతున్న ధారావాహికలు. అజంతా, దేవులపల్లి, రంజనీ కుందుర్తి, సమతా రచయితల సంఘం అవార్డు, తెన్నేటి హేమలత-వంశీ జాతీయ పురస్కారం, అంపశయ్య నవీన్ పురస్కారం మొ.న పురస్కారాలు పొందారు.
టోరీ రేడియోలో “గీతామాధవీయం” టాక్ షోని నిర్వహిస్తున్నారు. తానా తెలుగుబడి ‘పాఠశాల’కు కరికులం డైరెక్టర్ గా సేవలందజేస్తున్నారు. కాలిఫోర్నియా సాహితీ వేదిక “వీక్షణం”, తెలుగు రచయిత(త్రు)లందరి వివరాలు భద్రపరిచే “తెలుగురచయిత” వెబ్సై ట్ వ్యవస్థాపకులు, నిర్వాహకులు.