గోడలు

(సుభద్రాదేవి గారి కథపై సమీక్ష)

-డా. సిహెచ్.సుశీల

గోడలు… గోడలు… మనిషికి మనిషికి మధ్య గోడలు. మానవత్వానికి అడ్డుగోడలు. స్త్రీ చుట్టూ నిర్మించిన కట్టుబాట్ల గోడలు. సంప్రదాయాల పేరిట నిలిచిన బలమైన గోడలు. శీలా సుభద్రాదేవి గారు తన చుట్టూ జరుగుతున్న సంఘటనలను  కథావస్తువుగా, కవితాంశంగా తీసుకుంటారు. నాగరికంగా ఎంతో ఎదిగాం అనుకొన్న ఈ రోజుల్లో, సైన్స్ ఎంతో అభివృద్ధి చెందింది అనుకుంటున్న ఈ రోజుల్లో – ఇంకా మూఢ విశ్వాసాల సుడిగుండంలో మనుషులు మునిగితేలుతున్న కఠినసత్యాన్ని చెప్పారీ కథలో.
     ఎంతో ధనం వెచ్చించి, దగ్గరుండి ముచ్చటగా కట్టించుకొన్న ఫ్లాట్ లోకి విగతజీవిగా మారిన రాజారాం శరీరాన్ని తీసుకురావడానికి అనుమతించని అపార్ట్మెంట్ వాసుల మొండి వైఖరికి భార్య ఎంత క్షోభపడి ఉంటుంది! విదేశాల్లో ఉన్న అన్నలు  రావాలని కూతురు ప్రాధేయ పడటంతో చివరికి సెల్లార్ లో ఉంచటానికి అంగీకరిస్తే, అదే చాలనుకునే పరిస్థితి. ” శవం” వల్ల ఇన్ఫెక్షన్ వస్తుందో రాదో కానీ, ఈ ఇరుకు మనసుల సంకుచిత భావాల వల్ల మాత్రం సమాజానికి తప్పక “ఇన్ఫెక్షన్” వస్తుంది.
     ఈ వాదోపవాదాల మధ్య భౌతిక దేహం తరలి పోయింది. ఇంక అసలు తంతు – ఆ స్త్రీ “ముఖం చూడటం” అనే తంతు. భర్తను కోల్పోయిన స్త్రీ చివరిసారిగా పసుపు కుంకుమలతో, పూలు గాజులతో  అలంకరించుకుంటే, అందరూ వెళ్లి చూసి రావటం. కొండంత భాధని ఆమె గుండెలో దాచుకొని, ఒక ‘ప్రదర్శన’గా కూర్చోవటం… ఎంత హేయమైన సంఘటన! ఇక్కడే సుభాషిణి చలించిపోయింది. మొదటి నుంచి జరుగుతున్న గేటెడ్ కమ్యూనిటీ వారి చర్చోపచర్చల్లో తానేమీ చేయలేని నిస్సహాయురాలు. కానీ 11వ రోజు రాజారాం భార్యని వెళ్లి చూడటం, చూడకపోవడం అన్నది తన స్వంత  నిర్ణయం. అందుకే 11వ రోజు వెళ్ళవద్దని, మరో రోజు వెళదాం అని చెప్పింది కోడలితో.
   పదిరోజుల నుండి జరుగుతున్నదంతా చూసి, వికలమైన మనసుతో సుభాషిణి “నేను చనిపోతే అనాధప్రేతంలా సెల్లార్ లోనో, మంచు పెట్టెలో పెట్టి ఇంట్లోనో పెట్టకుండా నా శరీరంలోని ఏ అవయవం అయినా ఎవరికైనా ఉపయోగపడితే ఇచ్చేసి, అటు నుంచి అటే బూడిద చేసేయండి” అని స్ధిరనిశ్చయంతో చెప్పింది కోడలికి. 
       స్త్రీని బ్రతికుండగానే చంపేసేంత ఎత్తుగా బలంగా నిర్మింపబడ్డ గోడలు ఇంకా… ఇంకా.. అవసరం లేదు. సుభాషిణి లాంటి స్త్రీ ఆ గోడల్ని బద్దలు కొట్టడానికి ఒక అడుగు ముందుకేస్తే, మరిన్ని అడుగులు  అనుసరిస్తాయన్నది ,రాబోయే కాలంలో తప్పక జరుగుతుంది. జరగాల్సిన అవసరం ఎంతైనా ఉంది. ఆలోచింపజేసే కథ నందించిన సుభద్రాదేవి గారికి అభినందనలు.

*****

Please follow and like us:

One thought on “గోడలు (సుభద్రాదేవి గారి కథపై సమీక్ష)”

  1. నా” గోడలు” కథపై సుదీర్ఘ సమీక్ష రాసినందుకు ధన్యవాదాలు సుశీల గారూ

Leave a Reply

Your email address will not be published.