షర్మిలాం”తరంగం”
-షర్మిల కోనేరు
చిరాయురస్తు
అమ్మా నాకు బతకాలనుంది …కానీ నేను చచ్చిపోతున్నాను .
” నన్ను ఒకడు వాడి గదికి రమ్మంటున్నాడు , లేకపోతే నా ఫొటోలు సోషల్ మీడియాలో పోస్ట్ చేస్తానంటున్నాడు అందుకే చచ్చి పోతున్నాను “
అని ఉరి తాడుకు వేలాడిందో ఇంటర్ చదివే పిల్ల .
ఆ తల్లికి అంతులేని దుఖ్ఖం మిగిల్చింది .
” డాడీ లేకపోయినా నన్ను కష్టపడి పెంచావ్ .
కానీ నీ మొఖంలోకి చూసి మాట్లాడే ధైర్యం లేక చచ్చిపోతున్నా ” అని రాసింది .
ఇంతకన్నా ఆ తల్లికి గుండెకోత ఇంకేముంటుంది .
పిల్ల మనసు విప్పి తన బాధ ఇది అని చెప్తే ఎవరి కాళ్లు పట్టుకునో వాడ్ని బెదిరించో లేదా పోలీసులకు ఫిర్యాదో చేసి వాడి బారి నుంచి తప్పించేదాన్ని కదా అని ఆ తల్లి అనుక్షణం కుమిలిపోదా ?
వయసులో ఆకర్షణలు అత్యంత సహజం .
అవి ఏ పిల్లలకైనా లేవంటే వాళ్లలో ఏదో తేడా వున్నట్టేనని
నా అభిప్రాయం .
అందరం ఆ దశ దాటుకుని వచ్చిన వాళ్లమే .
ప్రేమో ఆకర్షణో ఒక కుర్రాడితో సాన్నిహిత్యం ఏర్పడుతుంది .
అవతలి వాడు దుర్మార్గుడైతే ఆ పిల్లతో సన్నిహితంగా వుండగా తీసిన ఫొటోలు చూపించి ఆ అమ్మాయిని బ్లాక్ మెయిల్ చేయడం మొదలెడతాడు .
ఇది మొదటి సంఘటనా కాదు ఆఖరిదీ కాదు .
ప్రపంచం వున్నన్నాళ్లూ వుంటుంది .
ఒక్కోసారి మోసపోయేది మొగపిల్లలు కావొచ్చు .
నాకు ఒకటి గుర్తొస్తోంది .
మా అమ్మాయి స్నేహితురాలికి ఇలాగే జరిగితే మేం వాడు ఫేస్బుక్ లో పోస్ట్ పెట్టిన వెంటనే చూశాం .
మా అమ్మాయి నాకు చెప్పగానే వాడి ఫోన్ నంబర్ కి ఫోన్ చేది తక్షణం ఆ పోస్ట్ డిలిట్ చేయమని చెప్పా !
పోలీస్ ని తీసుకుని ఇంటికి వస్తున్నానని చెప్పగానే వెంటనే పోస్ట్ తీసేశాడు .
తరవాత ఇంటికి పిలిపించి మాట్లాడి బాగా మందలించి పంపాను .
నేను జర్నలిస్ట్ అవ్వడం వల్లేమో పోలీస్ ని నిజంగానే తీసుకు వస్తున్నానని అనుకున్నాడు .
నిజానికి అటువంటి సమస్యలు ఎదుర్కునే పిల్లలికి ఇది ప్రాణం మీదకి వచ్చే సమస్యలాగే వుంటుంది .
పెద్దలు భరోసా కల్పించాలి .
వాళ్ల సమస్య ఏదైనా తల్లి తండ్రుల దగ్గర చెప్పుకోగల వాతావరణం వుండాలి .
ఎంత కఠినమైన సమస్యలైనా కుటుంబసభ్యుల సాయంతో ఎలా గట్టెక్కొచ్చో కొన్ని ఉదాహరణల రూపంలో చెప్తూ వుండాలి .
ముఖ్యంగా అర్ధతరంగా తనువుచాలిస్తే కోల్పోయే జీవితం విలువ గురించి కూడా సందర్భానుసారం పిల్లలతో చర్చించాలి .
ఈమధ్య చిన్న చిన్న కారణాలతో అంటే మార్కులు తక్కువ వచ్చాయనో చదవలేకపోతున్నానో ఆత్మహత్యలకు పాల్పడుతున్నారు . తల్లకిందులవుతుందనేంత వత్తిడి సృష్టించడం కూడా ఒక కారణం .
ఇక అత్తింటి వేధింపులతో ,భర్త హింసతో చావుల్ని ఆశ్రయిస్తున్న వారి సంఖ్యకూడా తక్కువేమీ లేదు .
అప్పులపాలై కుటుంబాలకు కుటుంబాలే విషం తాగి చనిపోతున్న వార్తలతో పేపర్ రాని రోజు లేదు .
బతికుంటే బలుసాకు తిని బతకొచ్చు లేదా ఏ రంగంలో రాణిస్తారో ఎంత గొప్పవాళ్లవుతారో !
ఈ విశాల విశ్వంలో మనకు చోటు కరువా .
ప్రపంచమంతా మోసం ,ద్వేషం , పగ , కామం వున్నట్టే నిజాయితీ , త్యాగం , ప్రేమ , ఔన్నత్యం కూడా వున్నాయి .
మనం బతకడానికి, మనుగడ సాగించడానికి , ఉనికి చాటుకోవడానికి కారణాలు వెతుక్కోవాలి .
అంతే కానీ అత్మహననానికి కారణాలు వెతుక్కోకూడదు .
*****
షర్మిల 20 ఏళ్లు డెస్క్ జర్నలిస్ట్ ఉద్యోగం చేసి విరామం తీసుకున్నారు. అలవాటైన రాతని , నమ్ముకున్న అక్షరాన్ని వదలకుండా వుండే ప్రయత్నం చేస్తున్నారు. ప్రస్తుతం ” కౌముది, సారంగ ” వెబ్ పత్రికల్లో కూడా శీర్షికలు రాస్తున్నారు.