“నెచ్చెలి”మాట
గదిబడి
-డా|| కె.గీత
“హమ్మయ్య ‘కరోనా పుణ్యమా’ అని, ఈ సంవత్సరం బళ్లు తెరవడం లేదోచ్ “
అని సంబరపడ్డ పిల్లలకి ఇప్పుడు ఇంటిబడి వచ్చి గట్టి చిక్కొచ్చి పడింది పాపం!
ఇంటిబడంటే
మఠమేసుకుని వీధిలోకి దిక్కులు చూసే అరుగుబడో
చెట్టు కింద హాయిగా లల లలా అని పాడుకునే వీథిబడో
అనుకునేరు!
పాపం గాలైనా ఆడని “గదిబడి”
అయ్యో గడబిడ కాదండీ, మీరు సరిగ్గానే చదివేరు- “గదిబడి”
అదేనండి ఆన్లైన్ బడి-
అంటే ఉన్నచోటి నుండి అంగుళం కదలనీయనిదనో
కనీసం కాళ్లు చేతులూ ఆడనివ్వనిదనో
మనోవికాసం మాటికేగాని మనోవికారం కలిగించేదనో
మనందంరం ఇన్నాళ్లూ దూరం పెట్టిన ఆన్లైనన్న మాట!
కానీ సరిగ్గా చూస్తే
ఈ గదిబడిని
పకోడీలు తింటూ చూసే టీవీ సీరియళ్లలా పాఠాల్ని ప్రసారం చేసే “టీవీ బడి” అనో
హోమ్ వర్కుల్ని సెల్ ఫోను లో కళ్ళు పోయేలా రాయాల్సిన “స్మార్ట్ ఫోన్ బడి” అనో
పిలవొచ్చు –
ఏవండీ నాకు తెలీకడుగుతాను
“స్మార్ట్ ఫోన్” లేని వాళ్లు కూడా ఉన్నారు కదా స్వతంత్ర భారతదేశంలో,
ఇంటింటికో ఫోన్ ప్రభుత్వం ఇవ్వొచ్చు కదా అని ప్రశ్నించే వాళ్లని
ఒక్క ఫోన్ ఎలా సరిపోతుంది మాకు ఇద్దరు పిల్లలు కదా అని కొట్టుకునే వాళ్లని
ఉన్నదొక్క టీవీ- పాఠాలే చదువుతారా? సీరియళ్ళే చూస్తారా? అని గొప్ప ఉపయోగకరంగా ఆలోచించేవాళ్లని
పక్కనబెడితే –
ఓ పక్క ఇంచక్కా
మేష్టార్ల గదమాయింపులు
టీచరమ్మల వడ్డింపులు
తప్పించుకున్నా
పెనం మీంచి పొయ్యిలో పడ్డట్టు
అనుక్షణం
పాపం పసివాళ్లకి
అమ్మ కనుసన్నలు!
నాన్న గద్దింపులు!!
స్మార్ట్ ఫోను పుణ్యమా అని
యూట్యూబు పుణ్యమా అని
అరచేతి పాఠశాలలో దొంగచాటు వీడియోలు హాయిగా చూసి సంబరపడ్డం మాట అటుంచితే
కరోనా గట్టెక్కేలోగా
చదువులు వస్తాయో లేదో తెలీదు గానీ
కళ్లద్దాలు మాత్రం తప్పకుండా వచ్చేటట్టే ఉన్నాయి పిల్లలందరికీ!
*****
డా|| కె.గీత పూర్తిపేరు గీతామాధవి. వీరు “నెచ్చెలి” వ్యవస్థాపకులు, సంపాదకులు. తూ.గో.జిల్లా జగ్గంపేటలో జన్మించారు. ప్రముఖ కథా రచయిత్రి శ్రీమతి కె. వరలక్ష్మి వీరి మాతృమూర్తి. భర్త, ముగ్గురు పిల్లలతో కాలిఫోర్నియాలో నివాసముంటున్నారు.
ఆంధ్ర విశ్వవిద్యాలయంలోఇంగ్లీషు, తెలుగు భాషల్లో ఎం.ఏ లు, తెలుగు భాషా శాస్త్రం లో పిహెచ్.డి చేసి, 10 సం. రాల పాటు మెదక్ జిల్లాలో ప్రభుత్వ కళాశాల అధ్యాపకురాలిగా పనిచేసారు. ఆంధ్ర ప్రదేశ్ ప్రభుత్వం నించి 2006 లో “ఉత్తమ ఉపాధ్యాయ అవార్డు ” పొందారు.అమెరికాలో ఇంజనీరింగ్ మేనేజ్ మెంట్ లో ఎం.ఎస్ చేసి, ప్రస్తుతం సాఫ్ట్ వేర్ రంగంలో భాషా నిపుణురాలిగా పనిచేస్తున్నారు.
ద్రవభాష, శీతసుమాలు,శతాబ్దివెన్నెల, సెలయేటి దివిటీ, అసింట కవితాసంపుటులు, సిలికాన్ లోయ సాక్షిగా కథాసంపుటి, వెనుతిరగనివెన్నెల నవల, At The Heart of Silicon Valley -Short stories (2023),Centenary Moonlight and Other Poems(2023) ప్రచురితాలు. నెచ్చెలి ప్రచురణ “అపరాజిత” – గత ముప్పయ్యేళ్ల స్త్రీవాద కవిత్వం (1993-2022) పుస్తకానికి సంపాదకులు & ప్రచురణకర్త. ‘యాత్రాగీతం’ ట్రావెలాగ్స్, ‘కంప్యూటర్ భాషగా తెలుగు’ పరిశోధనా వ్యాసాలు కొనసాగుతున్న ధారావాహికలు. అజంతా, దేవులపల్లి, రంజనీ కుందుర్తి, సమతా రచయితల సంఘం అవార్డు, తెన్నేటి హేమలత-వంశీ జాతీయ పురస్కారం, అంపశయ్య నవీన్ పురస్కారం మొ.న పురస్కారాలు పొందారు.
టోరీ రేడియోలో “గీతామాధవీయం” టాక్ షోని నిర్వహిస్తున్నారు. తానా తెలుగుబడి ‘పాఠశాల’కు కరికులం డైరెక్టర్ గా సేవలందజేస్తున్నారు. కాలిఫోర్నియా సాహితీ వేదిక “వీక్షణం”, తెలుగు రచయిత(త్రు)లందరి వివరాలు భద్రపరిచే “తెలుగురచయిత” వెబ్సై ట్ వ్యవస్థాపకులు, నిర్వాహకులు.
గడబిడ చదువు…. బాగుంది మేడం నేటి చదువుల తీరు…. 🌹
Thankyou Lakshman garu!