“నెచ్చెలి”మాట
సుంకము
-డా|| కె.గీత
సుంకమనగానేమి?
శుల్కమా?
పన్నా?
టాక్సా?
టారిఫా?
(లేక)
పై అన్నియునునా?
హయ్యో
ఖర్మ
ఒక్కటి వదిలేసారుగా-
ఏమది?
పైవన్నిటితో
బాటూ
“ముంచునది”
అది ఎట్లగును?
ఎన్నడూ
విన్న పాపమును పోలేదే!
అదే మరి-
ఆదాయపు పన్ను
వ్యయపు పన్ను
అమ్మకపు పన్ను
కొనుగోలు పన్ను
ఇంటి పన్ను
వాకిటి పన్ను
కూర్చుంటే పన్ను
నిల్చుంటే పన్ను
ఔరా!
ఇన్ని
పన్నులు
రాజుల కాలమున
దొరల కాలమున
పెత్తందారుల కాలమున
……
ఏ కాలమునను
ఉన్నట్టుల
దాఖలములు
లేవు
ఇంతేనా?!
ఎక్సైజ్
కస్టమ్స్
సర్వీస్
ఎంటర్టైన్ మెంట్
కార్పోరేషన్
…..
అంతేనా
పాత పన్నులు
కొత్త పన్నులు
…….
హతవిధీ
ఇక చాలును
పాత
సుంకములు చాలక
కొత్తవియును
ఉన్నవా
అయినను
అసలు
సుంకముల
వలన
నాకేమి
నష్టము?
ఏమి కష్టము?
ఎగుమతులకు
దిగుమతులకు
ప్రభుత్వములకు
దేశములకు
గాని
మరదే-
విదేశీ మారక ద్రవ్యాలు
స్టాకు మార్కెట్లు
ద్రవ్యోల్బణాలు
ఇళ్ళ ధరలు
కూరగాయల ధరలు
నిరుద్యోగాలు
బ్రతుకుతెన్నులు
ఎట్నుంచి ఎటు
ఏది మారినా
పడేదంతా-
సుంకమంతా-
సామాన్యుడి
నెత్తి మీదే
అటులనా?
ఇక
ఏమందును!
‘మునిగినది’
అని మాత్రము
అర్థమగుచున్నది
****
నెచ్చెలి పాఠకులందరికీ సదవకాశం:
ప్రతినెలా నెచ్చెలి పత్రికలో వచ్చే రచనలు / “నెచ్చెలి” యూట్యూబ్ ఛానెల్లో వచ్చిన ఆర్టికల్స్ వేటిపైనైనా వచ్చిన కామెంట్ల నించి ప్రతి నెలా ఒక ఉత్తమ విశ్లేషణాత్మక కామెంటుని ఎంపిక చేసి ప్రకటిస్తాం. పాత రచనల మీద కూడా కామెంట్లు చెయ్యవచ్చు.
మరింకెందుకు ఆలస్యం? రచనల్ని చదివి వివరంగా కామెంట్లు పెట్టడం ప్రారంభించండి.
వినూత్నం, వైవిధ్యం ప్రధాన నిలయాలైన “నెచ్చెలి”లో వస్తున్న వివిధ వినూత్న రచనల్ని తప్పక చూసి, చదివి ఆనందిస్తారు కదూ!
*****
మార్చి, 2025 లో ఎంపికైన ఉత్తమ కామెంటు రాసిన వారు: నీరజ వింజామరం
ఉత్తమ కామెంటు అందుకున్న పోస్టు:స్ఫూర్తి (కథ)-కప్పగంటి వసుంధర
ఇరువురికీ అభినందనలు!
****
డా|| కె.గీత పూర్తిపేరు గీతామాధవి. వీరు “నెచ్చెలి” వ్యవస్థాపకులు, సంపాదకులు. తూ.గో.జిల్లా జగ్గంపేటలో జన్మించారు. ప్రముఖ కథా రచయిత్రి శ్రీమతి కె. వరలక్ష్మి వీరి మాతృమూర్తి. భర్త, ముగ్గురు పిల్లలతో కాలిఫోర్నియాలో నివాసముంటున్నారు.
ఆంధ్ర విశ్వవిద్యాలయంలోఇంగ్లీషు, తెలుగు భాషల్లో ఎం.ఏ లు, తెలుగు భాషా శాస్త్రం లో పిహెచ్.డి చేసి, 10 సం. రాల పాటు మెదక్ జిల్లాలో ప్రభుత్వ కళాశాల అధ్యాపకురాలిగా పనిచేసారు. ఆంధ్ర ప్రదేశ్ ప్రభుత్వం నించి 2006 లో “ఉత్తమ ఉపాధ్యాయ అవార్డు ” పొందారు.అమెరికాలో ఇంజనీరింగ్ మేనేజ్ మెంట్ లో ఎం.ఎస్ చేసి, ప్రస్తుతం సాఫ్ట్ వేర్ రంగంలో భాషా నిపుణురాలిగా పనిచేస్తున్నారు.
ద్రవభాష, శీతసుమాలు,శతాబ్దివెన్నెల, సెలయేటి దివిటీ, అసింట కవితాసంపుటులు, సిలికాన్ లోయ సాక్షిగా కథాసంపుటి, వెనుతిరగనివెన్నెల నవల, At The Heart of Silicon Valley -Short stories (2023),Centenary Moonlight and Other Poems(2023) ప్రచురితాలు. నెచ్చెలి ప్రచురణ “అపరాజిత” – గత ముప్పయ్యేళ్ల స్త్రీవాద కవిత్వం (1993-2022) పుస్తకానికి సంపాదకులు & ప్రచురణకర్త. ‘యాత్రాగీతం’ ట్రావెలాగ్స్, ‘కంప్యూటర్ భాషగా తెలుగు’ పరిశోధనా వ్యాసాలు కొనసాగుతున్న ధారావాహికలు. అజంతా, దేవులపల్లి, రంజనీ కుందుర్తి, సమతా రచయితల సంఘం అవార్డు, తెన్నేటి హేమలత-వంశీ జాతీయ పురస్కారం, అంపశయ్య నవీన్ పురస్కారం మొ.న పురస్కారాలు పొందారు.
టోరీ రేడియోలో “గీతామాధవీయం” టాక్ షోని నిర్వహిస్తున్నారు. తానా తెలుగుబడి ‘పాఠశాల’కు కరికులం డైరెక్టర్ గా సేవలందజేస్తున్నారు. కాలిఫోర్నియా సాహితీ వేదిక “వీక్షణం”, తెలుగు రచయిత(త్రు)లందరి వివరాలు భద్రపరిచే “తెలుగురచయిత” వెబ్సై ట్ వ్యవస్థాపకులు, నిర్వాహకులు.