రోజు ఇలాగే
-మహెజబీన్
రోజు ఇలాగే కొత్తగా మొదలవుతుంది జీవితం
తొలిసారి చూసినట్టు ప్రతీ సూర్యోదయం అద్భుతమే
సంధ్యా సాయంకాలం ప్రతీ రోజు వర్ణ చిత్ర మవుతుంది
చూసినప్పుడల్లా సముద్రం ఆశ్చర్యమవుతుంది
పుట్టినప్పటి నుండి చూస్తున్ననీలాల గగనమే,
అయినా తనివి తీరదు
నక్షత్రాల్నిచెల్లా చెదురుగా పడేసుకున్న రాత్రి ఆకాశం,
దాని మీద కురిసే వెన్నెల చూపు తిప్పనీదు
ప్రతీ ఋతువు కొత్తగా కనిపిస్తుంది
వచ్చిన ప్రతీసారి వసంతం కొత్త రంగుల్నిఇచ్చి వెళుతుంది
వాన కురిసిన ప్రతీసారి అహ్లాదమే
తొలకరి జల్లులో తడవాల్సిందే అంటుంది మనసు
నిన్నటి కంటే ఈ రోజు మరింత బాగుంది
రేప్పొద్దున మళ్ళి కొత్తగా చిగురిస్తుంది జీవితం
*****
కవయిత్రి మహెజబీన్ మానవ హక్కుల న్యాయవాది, ఫెమినిస్ట్ రచయిత్రి, సామాజికవేత్త. ఆమె తొలి కవితా సంపుటి, ఆకు రాలు కాలం, సాహితీ విమర్శకుల మన్ననలను అందుకుంది. కవిత్వంతో పాటు ఆమె కధలు, సాహిత్య సామాజిక, రాజకీయ వ్యాసాలు కూడా రాసారు. ఆమె రచనల్లో ప్రధానంగా జెండర్ జస్టిస్ మరియు పర్యావరణ స్పృహ ( Eco-Feminism) కనిపిస్తుంది. సామాజిక చైతన్య మున్న రచయిత్రిగా, స్త్రీల హక్కుల న్యాయవాదిగా మహెజబీన్ సాహిత్య ప్రపంచానికి తెలుసు. DAAD Fellowship తో జర్మనీ వెళ్లి ఫెమినిజం చదువుకున్నారు. Europe దేశాలలో జరిగిన అనేక అంతర్జాతీయ సదస్సులలో పాల్గొని ప్రసంగించారు. United Nations/UN ఆహ్వానాన్ని అందుకొని NY/USA లో జరిగిన ప్రపంచ స్త్రీల సదస్సులో పాల్గొన్నారు. మహేజబీన్ కవిత్వం అనేక అంతర్జాతీయ యూనివర్సిటీ స్థాయి జర్నల్స్ లో ప్రచురించబడింది. Oxford University Press /UK , Wisconsin University Press /USA , Indian Literature , Penguin India, National Book Trust India/NBT ఆమె కవిత్వాన్ని ప్రచురించాయి. భారత ప్రభుత్వం నుండి స్త్రీ శక్తి పురస్కార్, జాతీయ అవార్డును అందుకున్నారు. ఈమె రాసిన స్ట్రీట్ చిల్డ్రన్ కవిత పదవ తరగతి పాఠ్యాంశంగా చేర్చబడింది. ఈ కృషికి గాను Ministry of Women and Child Development/ India నుండి రాజీవ్ గాంధీ మానవ సేవ జాతీయ అవార్డు అందు కున్నారు. రాష్ట్ర ప్రభుత్వం నుండి (United Andhra Pradesh State) కవిత్వానికి డిపార్ట్మెంట్ అఫ్ కల్చర్ అవార్డు, స్టేట్ లాంగ్వేజ్ కమిషన్ నుండి భాషా పురస్కారం, Telugu University award, అనేక సాహితి సాంస్కృతిక సంస్థల నుండి గౌరవ పురస్కారాలను అందుకున్నారు. Indian Diaspora తో కలిసి సాహిత్య సాంస్కృతిక
కార్యక్రమాలలో పాల్గొన్నారు.