ఖాళీ (కవిత)

ఖాళీ (కవిత)

– జయశ్రీ మువ్వా

ఏమైనా చెప్పాలనుకుంటున్నావా..?

ఏదని చెప్పాలి..

ముగించాలనుకున్నపుడు కామా కోసం వెతకులాట ఎందుకు?

చదవబడని పేజీలన్నీ వదిలెళ్ళు

నేనూ వదిలేస్తాలే

అందమైన కాగితం పడవలుగా –

అన్నట్టూ…

అద్దాన్ని ఓ సారి తుడుచుకో

బొట్టుబిళ్ళలు అంటించిన మరకలుంటాయేమో

కన్నీటి చారల మొకాన్ని కడుక్కున్నట్టు  ఫ్రెష్ గా-

అవునూ..

ముందు డికాక్షన్ పెట్టుకో

చేతికందించే కాఫీ కప్పు టేస్ట్ మారినా,

వంటగదిలో గాజుల మెలోడి వినపడ్డా పట్టించుకోకు

ఇలాంటివేగా ఎన్ని చెప్పినా…

నాకంటూ ఏమి  చెప్పాలని వుండని నీకు

***

అలవాటు మారే సమయం పెన్సిల్ తో రాసుకున్న

కొన్ని నిశ్శబ్దాలు, కొన్ని గాయాలు

టైం పర్ఫెక్ట్ ఎరేజర్ కదా..

*****

ఫోటో ఆర్ట్: రమేష్ పొతకనూరి

Please follow and like us:

జయశ్రీ మువ్వా -

నా నివాసం ఖమ్మం, తెలంగాణ. ఇపుడిపుడే కవిత్వం రాస్తున్నాను. చిన్నాన్న క్రాంతి శ్రీనివాసరావు గారు అందరికీ సుపరిచితమైన కవి. ఆయన నుంచి ప్రేరణ, స్వతహాగా కొంత తపన ఈ వైపు అడుగేసేలా చేసింది. నాకు పుస్తకాలు చదవడం, కొత్త ప్రదేశాలు చూడటం, కొత్తగా ఏదైనా నేర్చుకోవడం ఇష్టం. సంగీతం బాగా వింటాను.  స్నేహితుల సాయంతో  సామాజిక కార్యక్రమాలు నిర్వహిస్తున్నాను. ప్రస్తుతం గృహిణిగా వున్నాను.

-